Nao un tiedsje zeuke in us contrije dinke veer es Kanselarijraod iemens gevoonde te höbbe.
Eeder jaor opnuij is ut weer u gezeuk unne gooie te vinde.
In de kazjematte vrooge veer us aof, zouwe veer wel slaage um weer ‘nne sjieke en gooije te vinde.
Nou luij, de kanselarijraod dink dat sie daor opnuij in geslaag zien.

Leef luij, heer is gebore in ’n gezellige volksbuurt,blauw dörrep, es koejong speulde heer veul mét de vrowleuij op ut appeleweijke.
De gondulfussjaol woars de ierste sjaol boe heer es koejong op gezete heet. 
Es keend is heer unne kier hiel kraank gewees dobbele longonsteking höbbe ze us gezag, soe errig zelfs dat ze ‘m in ’t leger neet welde höbbe.

Nao de lieger sjaol heet heer iers de Mulo gedoon dee naom höbbe ze denao verandert in Mavo of dat door häöm koum wete veer neet.
Journalis wow heer weure mér dao waors heer oetgeloot en heet ‘r moote keese veur gét aanders.
Naodat ze ‘m aoch beij de pelisie höbbe weggesjik vanwege z’n nachblindheid is heer veur de klas tereg gekaome boe heer die boetländers nederlands heet geliert.

Es hobbies deit heer allerlei sporte soe es voetballe, badmintonne en tennisse, heer is zelfs begeleirer vaan un jeugteam.
Wandele en fietse deit heer ouch geere en de zuus um daan auch geregelt goon op z’n fietske.
Wie veer häöm vroogte um Hertog te weure dach heer iers dat heer te aajd woars méh toen veer mét sjatte zoen tien jaor de neve zoate zag heer direk jao iech daon ut.

Zien vröwke heet heer netuurlijk liere kinne in unne kaffee, um preceis te zien aon de platielstraot, geer wét wél dee met dat raat.
Ut waors neet z’n ierste vröwke begreep de Kanselarijraod mér dat woars wederzijds.

Nao un paar lestige jaore, boerum welle veer uuch bespaore, wouwe sie gere trouwe en dao waors vas werrek veur nudig.
Daorum heet heer soe es heer zeet 75 breeve geschreve aon groete bedrieve en tot zien en us verbazing kos heer al hiel gauw vast werrek kriege beij un groet bedrief boe veer allemaol mét te make höbbe.

Getrout is ur en oet dat houwelik is unne zoon gebore dee aoch gans gek is vaan de vastelaovend.
De aofgelaope weke zien zwoer weke gewees veur d’n onbekinde en de kanselarijraod.
Beij de fotograaf zien veer twie kier trök mote goon want her plakde neet op ut pepier en eeders kier wow her get goon drinke denaor.
Ut deurd ‘m te lang veur heer aon de geng kin.

Daorum beste luij heij op ’t plein lang genoog geawwehoord mage veer uuch veurstelle: Hermeniekes laot uuch hure, noe gét ut gebeure De nuije Hoeglöstigheid vaan 2006 vaan de Mineurs

HERTOG PETER D’N IERSTE.

Heer hét Peter Deckers gebore 13 miert 1900 + 5x 11, getrowd mët José Notermans en zie höbbe eine zoon, Tim vaan 12 jaor.
Heer werrek buij de belastinge en woent aon de baseliahof op Daalhof.