© 2019 by CV de Mineurs 

Hertog Dave d'n ierste

Wee bringk nog n weurs nao klara

Leef luij,

Veer heite uuch vaan harte welkom op us locatie Fort Koning Willem de Ierste.
Ut is us toch weer gelök um unne nuije Hoeglöstigheid te vinde.
Heer is gebore in Belsj, mèh ut is toch unne echte Mestreechteneer. Heer heet in Amie op de lieger sjaol gezete.
Es keend aog in Malpertuis gewoend en aog ins naor Daalhof verhuis, heer veult ziech daan ouch euveral toes.
Op sjaol studere waors neet zie sterkste punt, toch heet heer op ut stedelijk gezete mèh zörgde deveur tot heer geregeld oet de les woort gezat zoetot heer op de vriethof op ut terras kos zitte.
Um te kletse met onbekinde en de luij oet te loere.
Heer heet väöl aon zelfstudie gedoon en heet daan ouch hiel gèt in ziene mars. Ut is unne echte workaholic!

Vaan sport heet heer totaal gein benöl, es te häöm zègs tot Naomi Kromowidjojo keepster vaan MVV is, daan zeet: heer is dat zoe?
En este zègs tot Feyenoord oet Amsterdam kump, daan geluif heer dat.
Daan höb geer un bitsje un idee hoe sportief tot heer wèl neet is.
Heer wèrk in weer en wind, soms op huugte, daan weer hiel lieg, heer kin ouch good de brikke in de moer tèlle.
D'n handel zit häöm in ut blood, meh heer zeet tot heer noets iemes zal belazere.
Heer wèrrek euverdaag mèh ouch 's aoves. Wie veer al zagte: unne echte workaholic!

De kanselarijraod heet häöm veur de 11e vaan de 11e benaderd met u smoesje.
Toen heer de trap op kaom zaog heer 4 prinsefoto's haange en zag toen: Gôh, ut is heij u prinselijk hoes.
Heer had nog niks in de gaate. In de hoeskamer stoont op ut salontäöfelke een fles wien met de Hertogsteek dr op.
Heer zag: dat höb iech nog noets gezeen, mèh ut is wel leuk:Ut kwartsje veel nog neet!
Heer vroeg toen, Menier Cruts, iech dach tot iech heij u gesprek had met eur vrouw en uuch, en noe zitte heij 2 veur miech onbekinde manne.
Iech zag: Iech höb mien vrouw de weeg aof gesjik, en dat is neet veur niks. Ut kwartsje veel nog neet!
Toen höbbe veer häöm mèr de binkelikke vroag gesteld en de reactie waors neet te geluive.
Heer begòs get te stamele en waors gans vaan slaag.
Hielemäöl vaan ziene à propos, en daan te bedinke tot heer z'n munneke goot bij heet.
Veer höbbe häöm toen mèr un gleeske water gegeve um un bitsje bij zien positieve te kaome.
Heer zag toen: Wie moot iech dat aon mien vrouw goon vertelle? Die weurt gans gek!

Heer gong roont de klok vaan twelf naor hoes tow.
Zie vruiwke laog al in bed in deepe nachrös, heer lag ziech ouch en zag: Sjat, weur ins eve wakker, iech moot diech get vertèlle!
Zie zag: hèhè, wat höbste noe weer metgemaak?
Jèh, ze höbbe miech gevraog um Hertog vaan de Mineurs te weure.
Zie waor op slaag wakker, zie stoont subbiet stief vaan de adrenaline en reep: Mèèèèèh dat is sjiek!!
Dat höb iech altied gewèld: miene maan Prins vaan de Mineurs. Neij zeet heer, de Mineurs höbbe geine prins mèh die höbbe unne Hertog. Jèh daan Hertog. Geer snap dat zie die nach gein aog mie höbbe tòwgedoon.

Vaanaof dee tied zweeve zie zoegezag op un wolk, heer kreig neet mie alles goot met wat häöm gezag weurt.
Dao zitte häöm konstant dreij dinger in ziene kop: Carnaval - de Mineurs schlager - en de weurs vaan Klara.
Twiede keersdaag zeet zien vrouw: zèg jong, de wèts toch wel tot ut keersmis is, iech höb nog gei keersleedsje gehuurd, allein mèr de weurs en de Mineursschlager.
Heer vind ut zelfs zoe sjiek tot heer zien eige Mineurs manchetteknuip heet laote make.
Veurig jaor hadde veer eine dee ut bèste waor in ut kleije vaan Keuning Willem Alexander.
Mèh dit jaor höbbe veer eine dee is ut beste in: jèh wat ouch alweer? Ut veurig jaor waor heer al de bèste, mèh aog dit jaor is heer weer met dee pries aon de haol gegaange.
Heer is naomelijk weer de bèste makeleer vaan ut land gewore.

Maage veer uuch veurstelle: nuije Hoeglöstigheid vaan 2015:
 

Hertog Dave d'n Ierste

Heer heit Dave Crolla,
gebore 16 augustus 1973, 
getrouwd met Laura en zie höbbe un prachtige dochter Dahnée, dit is unne echter spring in ut veld.
Ut prinselijk palies is midden in ut riek vaan de Mineurs aon de Apollohof 135 te Mestreech.

Hoegachtend
De kanselarijraod