© 2019 by CV de Mineurs 

Hertog Eddy d'n ierste

Gekleurd op stap

Leef luij,

Veer heite uuch vaan harte welkom in us prachtige nuij locatie heij in Fort Willem d’n Ierste.
Laote ver sjus zien dit onderkaome pas toch geweldig bij de Mineurs.
Ut is de kanselarijraod toch weer gelök um unne Hertog te vinde.

Heer is gebore in Wieck en heer heet in Wieckerveld op de lieger sjaol gezete en aoch in sjaan. Eind jaore zeventig is de femilie naor de Heeg verhuis.
Heer is door de AIVD gescreend, mèh die luij höbbe hun taak neet good oetgevoerd, want heer heet een VOG verklaoring gekrege, estrein snap geer boeveur.
Un VOG verklaoring is un Verklaoring vaan Onbesproke Gedrag, mèh volgens de kanselarijraod mos dat un verklaoring onbesjof gedrag zien.
Ut is zoe dat de kanselarijraod altied mie wèt es de AIVD. In zien jäögjaore wie heer nog unne snotskiebel waor is heer misdeender gewees, daan maags te aonnumme dat heer u braaf jöngske is.
Niks is minder woer, zien awwers moote toch slaopeloze nachte gehad höbbe vaan dee koejong.

De kanselarijraod vogelde get dinger oet en zien daorum op ut brommerke naor Remund getooge.
Ze höbbe bij ut Bissjoppelijk Pelies aongebeld en de vicarus dooch ope, toen veer haom vrooge tot veer in de archieve wowwe duuke um get dinger te verifiëren euver de nuije Hoeglöstigheid versjoot heer vaan kleur. Wat bleek?
Es misdeender es de mès gedoon waor klipseerde heer ut’ m met u vrundsje naor ut altaar en droonk daor de kelk met wien leeg.
Heer zeet noe nog tot dat bès lekker wien waor, toen is eigelijk aog dat draankprobleem begòs. Want d`r is geine kaffee in Mestreech dee heer nog neet vaan binne gezeen heet.
Mèh wat erger waor aog de hosties verwisselde vaan eigeneer, die aote ze op of ze probeerde ze te verpatse op straot.
Dat doorde neet lang, want toen waore de raape gaar!

Heer mog neet ziene ierste Heilige Communie doen, mèh naoderhand is de sanctie door de bissjop verlieg en mog heer ze esnog doen. Mèh volgens us waors dit neet ziene Ierste Heilige Communie, mèh ziene 35e Ierste Heilige Communie.

Heer heet aog un technische opleiding goon doen want heer had get met brommerkes en naoderhand oto’s, dat waore toen nog echte brommerkes en neet vaan die goojekaope plastike Chinese dinger op raajer wie ze allewijl höbbe. Veural in Heugemerveld heet heer de straote onveilig gemaak. Heer onderheelt es technicus de brommerkes vaan zien vrundsjes, mèh es ze de jats op waore met die klommele op zeuk naor de meidskes daan had heer netuurlijk geregeld pech aon zie brommerke tot groet leedvermaak vaan de aandere.
Veurig jaor hadde veer unne Hoeglöstigheid dee in zien tienerjaore neet te temme waor, dee waor lid vaan MC de Flying Devils, nou daan höbste gèt! Mèh de kanselarijraod heet häöm op ut rechte pad gekrege én gehawwe. Dee veer noe höbbe oetgezeuk, dat is eine, es te veur häöm steis daan haw diech mer hiel erg röstig, want heer numb diech hiel goot de maot.

Ut oetzeuk vaan ut rokkostuum met häöm heet de kanselarijraod gries haor bezörg. Veer höbbe zoeget alle kleijerwinkelkes in Mestreech gehad, en dat zien ders nogal gèt. Heer is naomelijk hiel kieskeurig op zien kleijer. 
Ver zien aog nog in Nuth gewees in zoe’ne hiele groete groethandel boes te alles kins kaope, behalve gelök! Aog daor gei kostuum naor ziene zin. Toen ging häöm u lempke branne en zeet heer: “Luuster ins, veer make dat kostuum zelluf want die vaan miech kin hiel goot neije.” Boeop veer vroogte: “Wieväöl kinderkes höb geer daan?“

Daan euver dat gelök gesproke, dat heet heer gevoonde in Heugemerveld in ’83 in gemeinsjapshoes wat in die köjl laog. Ut waors zien allerierste meidske, en die heet häöm getemp gekrege en zie zien noe nog altied gelökkig same. Vendaog d’n daag is dat un unicum. Es echte Sjenge in hart in neere voonte zie ut sjeinbaar toch nudig um euver de grens te goon tröwwe. Zie höbbe netuurlijk aog hobby’s, ze goon geere op vekansie mer dat verdeene zie aog wèl. Want zie werke alletwie hiel hèl. Heer werk deks nog ’s aoves, ouch de kroeg is unne groete hobby, wie heer zeet: “Ver höbbe al un brak verzoope.” MVV is netuurlijk aog unne groete hobby vaan häöm, zèk gei verkierd woord euver us MVV‘ke, want daan numb heer uuch de maot.

Heer huurt geregeld de bèlkes rinkele, en ut moot gezag zien, heer heet get met blouw blood, vendaor aog die VOG verklaoring. Ut is us u raodsel wie heer um dat geflik heet. Bij häöm is de klant keuning dus geer snap noe tot ze zelf de brook moote zien op te hawwe, mèh dat lök hun wel aordig dachte veer zoe.
Mèh noe, wat veul sjieker is is tot neet allein de klant keuning is, mèh aog tot de keuning klant is, jewel Zijne Koningklijke Hoogheid Willem-Alexander.
Heer is zoegèt keend aon hoes in Villa Eikenhorst.

Maage veer uuch veurstèlle de nuije Hoeglöstigheid 2014,

Hertog Eddy d’n Ierste

Heer is Eddy (Ed) Lamberigts, heer is geboore 2 juli 1967.
Heer is getrowd met Peggy Janssen en zie höbbe twie prachtige kinder.
Unne jong genaomd Devin en meidske genaomd Indy.
Ze bestiere hunne toko in speciaal kostuums mèh aog gewoen hieremode.
Hiel väöl sjöttereije en veurnaom luij laope roond in kostuums vaan hun makelij. Heer heet dus al hiel väöl prominente figure de maot genome.

Hoegachtend
De kanselarijraod