Nao lang zeuke in us kontrije, en zellefs e stökske daorboete, höbbe veer es Kanselerijraod eine gevoonde.

Eeder jaor obbenuits is 't weer 'n opgaaf um unne gooje te vinde.
In us eige Kazjematte zien veer met e spinsleech op zeuk gegaange.
Bij 't sjijnsel vaan de maon zage veer haom stoon; dat moot 'm zien zagte veer tegenein.

Leef luij, veer zien gruuts d'r op tot veer weer d'rin geslaag zien um 'ne nuijen Hoeglöstigheid veur us vereiniging te höbbe gevoonde.

En iech kin uuch zegke; dit is 'ne propere, unne jonge vent dee gein probleme heet um d'r geswanjeerd op te stoon.

Heer is geboortig vaan Caberg, boe heer 't levensleech zaog in de naozomer vaan 1980. Daor heet heer es koejong zien ierste levensjaore doorgebrach.

Nao de lieger sjaol vaan St Christoffel bezeuk te höbbe heet heer 't Trichtercollege good doorlaope. Inmiddels waor heer met pa en ma verhuis naor d'n aandere kant vaan de brög. Daor heet heer aon 't Leeuwenborghcollege de MEAO opleiding met succes aofgeroond.

Ondertösse trok Mestreech-Wes 't gezin weer aon en woende uzze nuije in Daalhof en vervollegens op Belfort.
Zien ierste baon ging wie 'ne film aon haom veurbij aon d'n aandere kant vaan de Maos. Oeteindelek heet heer ziene werkkrink gevoonde is us kontreije.
Heer is commercieel good oonderlag en is oondertösse 'n aontal jaore wérrekzaam in de baank- en verzekeringswereld. Es 'ne roejen draod läöp voetballe door zie leve. Heer is al mie daan 20 jaor 'ne zier fanatieke MVV supporter en späölt bij 'n veuraonstaonde ammeteurvereiniging in Mestreech. Daor is heer ouch nog jäögleijer vaan 'n B elleftal en heet heer zellefs 'n bestuursfunctie gehad.
Wie veer häöm vrooge um us vereineging veur te goon in de Vastelaovend vaan 2008 twiefelde heer gei momint en kroog heer geliek sjevraoje.

Uzze nuijen Hoeglöstigheid geit momenteel, um eve in Karnevalstèrreme te praote, es Einzelgenger door 't leve.

De aofgelaope weke zien zwoer gewees veur de noe nog groeten oonbekinde mer veer kinne uuch verzekere tot heer ziech good heet veurbereid op zien zwoer taak die häöm te wachte steit. De site vaan de Mineurs is oondertösse veur haom gesnooje kook
Heer steit te springe um aon de geng te kinne!

Daorum beste luij heij in 't Atrium, hiere Mineurs, genoog gemould.
Maag iech uuch veurstèlle en, herremeniekes laot uuch hure, heij is:

De nuijen Hoeglöstigheid vaan de Mineurs vaan 2008:

HERTOG DENNIS D'N IERSTE !!!!!

 

Voloet hèt heer Dennis Ummels, gebore op 23 september 1900, 7x 11 + 3 x 1. Heer woent aon de Trappendaal in de Heeg mer zienen Tempel ligk aon de Schippersdreef in Belfort.
Dennis is wérrekzaam bij de SNS baank aan de Keurmeistersdreef in Belfort.
Maag iech uuch vraoge um nog eine kier eur han opein te bringe veur uzze nuije Hoeglöstigheid ………….
Hertog Dennis d'n Ierste