Nao 'n tiedsje zeuke in us kontrije höbbe veer es Kanselerijraod weer eine gevoonde.

Eeder jaor obbenuits is 't weer e gezeuk um unne gooje te vinde. In us eige Kazjematte zien veer met e spinsleech op zeuk gegaange. Bij 't sjijnsel vaan de maon zage veer haom stoon; dat moot 'm zien zagte veer tegenein.

Leef luij, veer höbbe haom veur uuch ingepak en de bon nog eve bewaord, mer veer zien devaan euvertuig tot veer opnuij 'ne gooje veur us vereiniging gevoonde höbbe.

Heer is gebore in Daalhof, midde in de zomer vaan 1972. Daor is heer es gamin ouch naor sjaol gegaange op de Fons Olterdisse.

Nao de lieger sjaol is heer naor de Trichtermavo gegaange. Daor steit heer nog altied bekint es d'n ierste lierling dee mèt d'n oto naor sjaol kaom. Daornao heet heer de MDS gedoon.

Wat heer in eeder geval wis waor tot heer get met elektronica en kompjoeters wow goon doen.

Vaan beroep is heer daan ouch MCSE-er; in gewoen leeketaol heer is zier bedreve met de pc en alles wat daor met samehink qua èllentrik.

Heer heet versjèllende werkkringe gehad mer altied met 'ne link naor de kompjoeter. Oondertösse heet heer zèllefs 'n eige bedrijfke opgestart.

Es 'ne roejen draod läöp 't make vaan meziek door zie leve, boebij Vastelaovendsmeziek de bovetoen voert.

Wie veer häöm vrooge um us vereineging veur te goon in de Vastelaovend vaan 2007 twiefelde heer gei momint en kroog heer geliek sjevraoje.

Uzze nuijen Hoeglöstigheid geit momenteel, um eve in Karnevalstèrreme te spreke, es Einzelgenger door 't leve. Heer is unne supergruutse pap vaan 'ne zoon en 'n dochter. De aofgelaope weke zien zwoer gewees veur de noe nog groete oonbekinde; heer steit te springe um aon de geng te kinne.

Daorum beste luij heij op 't plein, hiere Mineurs genoog gemould.

Mage veer uuch veurstèlle en herremeniekes laot uuch hure, De nuije Hoeglöstigheid vaan de Mineurs vaan 2007

HERTOG RON D'N IERSTE

Heer hèt Ron Rammers,gebore op 16 juli 1900, 6x11 en 6, pappa vaan Joey vaan 7 en Jamilla vaan 5. Heer woent aon de Glazeniersdreef in Belfort.

Heer heet zien eige bedrief (RJ Computers) is lid vaan Mixed Harmony, opriechter en muzikaal leijer vaan Zaate Herremenie Sjöt In en aajd Kachelpieper.

Maag iech uuch vraoge um nog eine kier eur han wèrrem te klappe veur uzze nuije Hoeglöstigheid 
Hertog Ron d'n Ierste

CV De Mineurs
De Kanselerijraod,