© 2019 by CV de Mineurs 

Hertog Rudi d'n ierste

Verleef Op 'T Mooswief

Nao lang zeuken heet de Kanselarijraod weer eine gevoonde, 't is eeders keer weer spannend.
In de kazjematte vraoge veer us steeds weer aof, zouwe veer weer 'nne sjieke, gooije, geweldige vinde.
Nou luij, de kanselarijraod dink tot 'r dao weer in geslaag is.

Leef luij, heer is gebore op Sint Pieter, es koejong heet heer netuurlik oppe kribsweeg op sjaol gezete. In sporte bloonk heer oet, veural met voetballe. Oetloere waors neet zien sterkste punt, es koejong heet heer ins 'n crossfietske gehad, en geer geluif 't neet, binne de kortste kiere koste ze häöm oet de prikkeldraod knippe.
Ze höbben häöm gelökkig weer fetsoenlik ineingeplak gekrege, aanders hadde veer noe 'nne gesjendeleerde hoeglöstigheid gehad.

Nao de lieger sjaol heet heer de MAVO gedoon, of heer zien diploma heet gehaold, laot iech in 't midde. 't Is häöm noe neet mie aon te zien, heer moot toen 'n lief wie 'nnen ellestik höbbe gehad, want de zjimmenastiklieraar waore z'n beste mäötsjes.
Heer heet nog geprobeerd de sportacademie te doen, mèh dat is ouch niks gewoore, eigenlik vaanwege de examenvrees. Tot heer rap de zenuwe heet, dao is de kanselarijraod wel achter gekómme.
Nao tot veer häöm gevraog hadde, belde heer d'n daag danao al op um te vraoge of heer al neet aon de gèng kos gaon, mèh zoe wèrrek dat netuurlik neet.
Ouch zien vròw heet hiel gèt te stellen met häöm gehad, op 'n gegeve momint reep zie höllige maarija, dee maak miech harstikke gék!

Heer kin ouch alle straote in Mestreech, heer heet euveral roondgelaope.
Zienen deenstied heet heer veur 'n groet gedeilte doorgebrach in Duitsland. 
Dao heet heer liere zoepe. Heer zaot dao mèt 'nne Hagenees op de poskamer.
Dee kòmpel waors ederen aovend hartstikke, zeet heer!!
Ut verwonderd de kanselarijraod daan ouch neet tot heer ieder "nein" zeet tege zien vröw es tege 'n pèlske. Iech dink tot d'n Adjudant nog 'n zwoer taak kreig um häöm in 't gareel te hawwe.

Wie veer häöm vroogte um Hertog te weure, waors heer gans verpopzak. "Kin dat daan?" vroog heer. "Jèh," zag heer, "de moos toch vaan onbesproke gedrag zien? Iech zèg 't uuch mèr ierlik, iech höb 'nne kier veur 'n wèddesjap in mien bloete kònt geloupe in de stad". Och jèh, de bis joonk en de wèls gèt, dink de kanselarijraod mèr.

Heer heet thoes al stevig geoefend es Hertog, heer goeide de hènnekes geregeld de loch in, 't klein vraog daan: "Pap, wat höbs tiech toch?". "Och keen", zag heer daan, "iech veul miech neet zoe lekker, iech bin gèt steif en probeer de spierkes gèt los te goeie".
Mèh 't waore netuurlik gewoen de zenuwe.

Heer heet zien vrow liere kinne toen ziene pap de centrale verwerreming leet aonlegge door iemes nao d'n tied; alweer 'nne zwartwerker! Dee maan had 'n leuke dochter, mèh dat interesseerde häöm gaaroets neet, heer had allein mèr oug veur balle en bèlkes. Die koppele zien door de centrale verwerreming vrun gewore en gònge zoedoende elk jaor same op vekansie met resp. zoon en dochter. Heer zaog de ierste jaore gaaroets niks in häör, heer had ummers gèt mèt balle en belkes.

Mèh op u gegeve momint waors 't daan zoewied, op 'n camping in spanje is 't gebäörd. Inins vloog de vònk euver, en wat veur 'nne vonk, 't waors geine zwaakstroom, geine sterkstroom 't waors hoegspanning! Minstens 100.000 volt.
De zuus noe nog tot ze verbrande lippe höbbe gehad vaan de voonke.

Die leefde heet es resultaat tot zie twie prachtige dochters ineingesteeld höbbe, neet op dee camping netuurlik, mèh naodat zie 'n paar jaor getròwd waore.

De aofgelaope weke zien enerverende weke vuer d'n ònbekinde en de kanselarijraod gewees.
Beij de fotoreportaasj gòng alles mis, d'r waore gelökkig al twie foto's gemaak en toen gebäörde 't, 'nne sláág; kwak boem.
Wat gebäörde: 'n groete sjuifdeur kiepde oet de sponning bove op 't statief mèt 'nnen deure camera, 't dink mèt 'nne kwak op de groond, en jewel: Camera nao de kloet, sjaoj +/- € 5000,=, veer höbbe de fotograaf belaof um neet ziene naom te neume.

De oorkonde sjrieve waors ouch al 'n probleem. De maan dee dat deit, waors met ziene fiets op z'n pan gegaange, resultaat: vinger gebroke! De mins mèt al us euverredingskrach umgelölt um 't daan toch mèr te probere, 't resultaat maag d'r zien!
D'n onbekinde is ouch 'nnen echte vereinigingsmaan, heer is bestuurslid en penningmeister, heer is ouch good in van alles te regele, zoe eine kinne de Mineurs wèl gebruuke.

Beste luij heij verzameld op 't plein, d'n onbekinde heet jaore laank gewerrek in de Breuselsepoort, dus 't is veur väöl vaan uuch 'n bekinde snoets, heer wèrrek noe sinds e dik jaor es administrateur op 'n bepaolde baank. Iech höb noe wèl genòg gezag.

Maage veer uuch veurstelle:
De nuij Hoeglöstigheid vaan 2004

HERTOG Rudi d'n IERSTE

Heer hèt Rudi Weijts gebore 13 augustus 1961, getròwd met Anja Vos en zie höbbe 2 dochters,
Kim vaan 14 jaor en Jaimy vaan 11 jaor
Heer wèrrek op de Rechtbaank bij de vreemdelingendeens en heer woent op de Beeldsnijdersdreef te Belfort.